الجود من الاجواد يثمر ويغرس
 

يالله بتدبيرك لها تطلع الشمس
يامنزل القران ذكر ن سماوي
سار القلم ينثر دموعه على الطرس
واطرب مع حرفه بخط الفتاوي
اشغلت له الأفكار والعقل والحس
صغنا الذهب بإبداع قلب ن نقاوي
الناصري لا ضاق باله وهوجس
يمشي دروب العز حاله فداوي
أبرأ الى الله ما نطفف ولا ابخس
نازن على المعيار بيع وشراوي
فالبارحه فالمجلس اقوم واجلس
للبال ابد ما طاب كيفي القهاوي
البن الأشقر له مزاج ن مع الحمس
لكن بعض الاحيان ماله طراوي
همي وحزني تحترف لعبة التنس
والقلب عاش الدور سارح وضاوي
وشعري مخاويني معاه اتونس
احرر المعنى و بعضه شفاوي
ابطيت فالباطن و فكري تعومس
جنوب عن رفحا وغرب الصداوي
ضاقت بنا الحيلات ياراعي الفكس
ارسل قصيدتنا بمسك ن وجاوي
لك خدمة ن فالثانيه تسبق الجمس
ايضا ولا بدربك طعوس وملاوي
وازكى تحايانا من النفس للنفس
طيب النشاما فوق بشت ن حساوي
للسالفه عنوان والشرح الدرس
باسم الرفيق الكفو صقر النداوي
صقر ن تعلا في جباله تروس
صيده جزيل ن بالقنص والغزاوي
مفلح معايل للعلا لبسها لبس
فصل ثيابه واجتهد للعلاوي
ياكم رجيت علوم والحال ميّس
وصار الأمل في وقفته والعزاوي
سلم حروف ن للمشاعر تلامس
لا هان ابو سلطان ماله سهاوي
شاعر معاني في علومه تحمس
لا صاغ من صعب الامثال قاوي
والطيب واضح من سعد ومتأسس
فزعةخوي والصدق درب النجاوي
الجود من الاجواد يثمر ويغرس
وبالخير يا هداج جمك رهاوي
لاعاد تفحص نبضة العلم وتجس
وقفة وفاكم من كبار المناوي
ان كلح البرطم والأرياف تيبس
حقاً علينا ردها بالثناوي
لويرتخي ياربعنا الحبل ويمس
نبقى على العدوان سيل النحاوي
الطيب يجمعنا على الباس والإنس
ولا همنا منهو قصر بالحراوي
من زندنا سن اللبن شاله الضرس
ياللي ورا الصفين رميك سماوي
هذي الايادي تجمع الكف والخمس
وتزرع لها الحساد كيد وعداوي
والشور مايبنى مبطن على دس
ولا خير فيمن لا صدق بالدعاوي
من سار درب الخير لا عاد ينكس
عيبا عليه اليا رجع للخزاوي
رعا الردا يستاهل الطمس والطمس
ومن طب سوق الحب قالوا شقاوي
محبته باليوم من نظرة الامس
ويا كثر ماصدر حروف وشكاوي
يقول ساهر بالليالي ولا انعس
والكبد مع قليبه راحت مشاوي
اخاف ناس ن طبعها تلحس الدبس
تسمع علومي ثم تصدر بلاوي
وبلادنا معروفة ن قبل الأطلس
وبعد الربيع يصير دهرا سناوي
ويالله بتدبيرك لها تغرب الشمس
وصلوا على طه وزيدوا دعاوي

شعر/ناصر آل جمان
26-6-1428

رد: الجود من الاجواد يثمر ويغرس
 

صح لسانك وسبعة انعام بك وبابن حاضر

تحياتي..

رد: الجود من الاجواد يثمر ويغرس
 

رد: الجود من الاجواد يثمر ويغرس
 

اخوي ناصر صح لسانك وسبعة انعام بك وبابن حاضر

وتقبل مروري