ما يصد الحديد الا الحديد
 

جمعت بين
الشاعر ضيدان بن صبيحان اللزيزي العجمي(المسن)
و الشاعر المرحوم سعد بن عبد الله بن حسين الهتلاني العجمي(الشاب)
صداقة مميزة رغم فارق السن الكبير بينهما إذ كان المرحوم سعد شاباً
بعكس صديقه المسن ضيدان, وحصل بين الشاعرين
رديات كثيرة تمتاز في الغالب بالطرفة حيث يحاول كلاً منهم إغاظة الآخر
في إطار من المزح الودود.
ولم تحل دون هذه الرديات سوى وفات سعد (يرحمه الله) عام 1991م
اثر إصابته بمرض السرطان الذي عانى منه طويلاً
ونطرح لكم بعض من المحاورات التي جرت بين (ضيدان و سعد "رحمه الله" )
التي تمتاز بالطرافه (وكانت في دوله الكويت)**** :-

1- شاهي وحليب

في احد المقاهي دار هذا الحوار الذي بدأه ضيدان معترضاً




ضـــيــــدان:
تطلب لي الشاهي وتطلب لك الحليب***************** وأنا علـى الحليـب كبـدي ذايبـه
أنا احمد الله يوم ما أنت بـلي نسيب************ يقطـع صبـيً مـا يقـدر شايبـه

فـرد سعـد متأففـاً:
قم اطلب لنفسك ترى مانت بغريب***** ولا ني بطالب لك ولانب بـجايبـه
تبغى الكفيّا يوم طريـت المشيـب***** واتعبتنـي مثـل الوزيـر ونايبـه

فـقـال ضـيـدان:
في خوّة الطيب أنا مالـي نصيـب***** ومن خوّة الرديـان نفسـي طايبـه
قد كان ظني فيـك للعلّـه يطيـب***** والاريا بها مخطي وفيهـا صايبـه

وكان رد سعد الأخير:
كل يبي يرمي رفيقه فـي القليـب******وابليـس نـوخ عندنـا ركايـبـه
وعلمته الممشى سبقني في الخبيـب**** اللـي علومـه كلبوهـا خايـبـه


2- الخط السريع

بعد أن باع ضيدان التاكسي الذي كان يملكها رأى زبون واقفاً
في الطريق فقال لسعد الذي كان يقود السيارة طالباً منه التوقف
وتوصيل الزبون



ضــــــــيـــــــــدان:
اللي يلوح لك على الخـط السريـع**** الظاهر انه يا سعـد مـن ربعنـا
وقف ترى المعروف عمره ما يضيع***** خلاّية الرجلي مهـي مـن طبعنـا

رد سعد (رافض الوقوف) شك في الزبون:
هذي سواتك قبـل للتكسـي تبيـع**** من لا يعرفك يبتلش فـي وضعنـا
صاحبك هذا وقفتـه وقفـة خليـع*** حنا على الشارع وريحـه نشعنـا

رد ضـــــــيــــــــدان:
خله ونرجع له ليا طـاح الربيـع**** ذا عرضته يمكـن تفـرق جمعنـا
حنا ما صدقنا إن حن ناتي جميـع**** وشفنا تهاوشنا وهـو مـا سمعنـا

رد ســــــــعــــــــد:
طوفت لك هذي وحلـم الله وسيـع**** ياللـي نحـاول للمشاكـل دفعنـا
لا تنفضح طِعني وسـرك لا يذيـع*** هـذا وشكلـه مـا ينالـه نفعـنـا


3- الطيور الحايمة ****

جاء ضيدان إلى صديقه سعد وقد أحس أن عنده ثروة يخبئها في البنوك فبادره قائلاً



ضـــــــــــيــــــــــــدان:
عطنا من اللي يا سعد ربي عطـاك***** عندك فلوس في البنـوك و نايمـه
وأنا رفيقك دايـمٍ و امشـي وراك*** وما ادري متى تمطر سماك الغايمه

فـــــــــــرد ســـــعــــــد:
اللي عطاني خير بالشحـذه بـلاك**** هـذي عطايـا الله وذي قسايمـه
يومك حسود وتـو مابيـن رداك**** ما عندنا لك مـا يفطـر صايمـه

وهنا جاء وقت التهديد والتذكير بما مضى فقال ضيدان:
أظن من زارك ببيتك مـا نسـاك**** ولا أظـن مثلـك تنّسـي قدايمـه
يا رجل فكر زين والرب يهـداك****** عزم ترى الرجال مـن عزايمـه

رد ســــعـــــد غـــاضـــبـــاً:
تعش عندي جعل ما تاكل عشـاك***** عسى تعشـاك الطيـور الحايمـه
واللي لنا جابك عسى يقطع مـداك******* واللي يبي فرقـاك محـدٍ لايمـه

وانـهــي ضـيــدان الـحــوار بـالـقــول:
لا تحسب إنا قاعدين فـي رجـاك****** وعاد الجمل يمشي علـى قوايمـه
يالله يالمعبـود جـارك ودخـلاك*******راحت خسارة ذا الصبـي تمايمـه

لاهنت يابن خريم

علي مانقلت

وصح لسانك وصح لسان الشعراء

صح لسانك

بيض الله وجهك على هذا النقل الجيد

لاهنت يا ابن خريم على هذه الرائعة و نطلب منك المزيد لانك بحر لاينضب

بيض الله وجهك يا ابن خريم على ما كتبت وصح لسان الشعار