شبكة قحطان - مجالس قحطان - منتديات قحطان - || قصائد الشاعر الكبير / فلاح القرقاح || امام خادم الحرمين الشريفين في منطقة عسير

الأخوه الكرام أعضاء وزوار شبكة قحطان

السلام عليكم ورحمة الله وبركاته

يسرنا أن ننقل لكم خطياً وبالصوت

القصائد الثلاث للشاعر الكبير / فلاح القرقاح

والتي القاها أمام خادم الحرمين الشريفين الملك عبدالله بن عبدالعزيز

أثناء تشريفه حفل أهالي منطقة عسير يوم الخميس 11/10/1427هـ

.
القصيدة الأولى

http://www.qahtaan.com/works/up/down...1162817846.ram

[poem=font="Simplified Arabic,5,blue,bold,normal" bkcolor="transparent" bkimage="" border="none,medium,gray" type=4 line=0 align=center use=ex num="0,black"]
الرعد والبرق والغيم وانسام الهبوب = والمزون اللي تشوق العيون نصوبها
ساقها الرحمن من كل حدب وكل صوب = والتقت من فوق قمة عسير دروبها
نطحت السحب الركامية جبال الجنوب = وفي سماها ذابت جنوبها في جنوبها
الشوامخ لبست الثلج والماء لبس ثوب= والسهول استقبلت ضيفها باسلوبها
الارض صارت تحت زخم النوامي والعشوب = جادلٍ صبحية العيد تلبس ثوبها
عيطموس وبنت شيخٍ معنز ومحسوب= فتنةٍ من ناصيتها الى عرقوبها
ربعَت بقدوم غيث المنازل والقلوب = الملك عبدالله محبها محبوبها
حاكم يرهيٍ على شعب ويساند شعوب = ويدعم الامة وحكامها وشعوبها
جنُب بلاده الاهانة وويلات الحروب= يوم غيره صارو اذنوب فوق ذنوبها
مرحبا بك يا أبيض الوجه حلال الكروب= في الظروف اللي تهول العقول خطوبها
بين أهل صدق موالين ما فيهم كذوب = استغلوا فرصة قدومك وفرحوا بها
انت بأمر مكون الكون علام الغيوب = قبل تملك مملكتها ملكت قلوبها
وابو خالد مرحبا به تراحيب الوجوب= عد نور الشمس وشروقها وغروبها
ياهلا يا رمز الاخلاص والجهد الدؤوب = لا احضرت اهل المواجيب في ما جوبها
في ديارك وانت فيها يا سلطان محبوب = ابرك الايام يوم يجيبك صوبها
عشت والي عهد غيث المنازل والقلوب = الملك عبدالله محبها محبوبها
حاكمٍ يرهي على شعب ويساند شعوب =ويدعم الامة وحكامها وشعوبها[/poem]

.

القصيده الثانيه

http://www.qahtaan.com/works/up/down...1162818107.ram

[poem=font="Simplified Arabic,5,blue,bold,normal" bkcolor="transparent" bkimage="" border="none,medium,gray" type=4 line=0 align=center use=ex num="0,black"]
يا سيدي قبل تقريبا ثلاثين عام=سقت اول خطاي بين البيت والمدرسة
ودرست كل الكلام اللي عليه الكلام= في الفقه والجبر والتفسير والهندسة
قريت سيرة رسول الله خير الانام=وادركت ليش الوطن يستاهل نقدسه
وعرفت كيف انتصر عبدالعزيز الامام=ووحد وطنا ولم اشتاته وسيسه
وزميلي اصبح مثالي في الادب والنظام=يهتم في كتبه ويهتم في ملبسه
اللي من اول يشيل مسدسه في الحزام=صار قلمه محزمه وكتابه مسدسه
الطالب اكرم بعلم وتربيه واهتمام=والحر يفرح به الصقار لا قرنسه
حصل على ملبس ونقل وشراب وطعام=وجوايز تدفعه للعلم وتحمسه
حملات وزارة الصحة تجي بانتظام=بوقايةٍ من جراثيم الوبا تحرسه
العلم يمحى الجهل والنور يجلى الظلام=لولا الفكر فضِل العامل على ريَسه
كنا بدو قح نجهل حتى آداب السلام=والجهل لو جا على العود الخضر يبسه
احدٍ يسوق النخل واحدٍ يسوق الجهام=وأحدٍ ورى الصيد كامل جهده يكرسه
كم خشف ريمٍ ما يرعى الا غصون البشام=خلى المشوك مع الصفره يصك نفسه
رغم الفقر والمشقه والظروف الجسام=ما منا رجال عن ضيفه قفل مجلسه
بجهودكم ياهل العوجا بلغنا المرام=عز الله انها جهود ما هي بمفلسه
التنمية والبنا والبذل والاحترام=يشهد لها الواقع اللي كلنا نلمسه[/poem]

.

القصيده الثالثه

http://www.qahtaan.com/works/up/down...1162573670.ram
[poem=font="Simplified Arabic,5,blue,bold,normal" bkcolor="transparent" bkimage="" border="none,medium,gray" type=4 line=0 align=center use=ex num="0,black"]
بريةٍ ما طب في السوق نوعها= بهارها غالي وحالي قدوعها
خيرة ثمار الباسقات المشمرخة = خضر الجريد اللي طوال فروعها
عز الله ان فنجالها يبعد الخوا = وهاذي مواطنها وهاذي ربوعها
يا خادم البيتين يا حاكم الوطن =حجابها لا خفت وطار شوعها
يا نورنا الوهاج في ديجر الدجى= درع الجزيرة من ضماها وجوعها
صقر العروبة من بحرها لبرها = ذخر أمة محمد مطبق شروعها
حلال عسرات القضايا ليا اصبحت = صعبٍ تقدمها وصعبٍ رجوعها
حقنت دم الأمة اللي تناحرت = ووحدت كلمتها وهديتها روعها
واللي ورى القضبان فرجت كربته=رفيت خلاتٍ ما ترفى شلوعها
ولو نبغي نعدد خصالك يا سيدي= ناخذ سنة من سبتها لا ربوعها
يهناك حب الشعب باكمل طوايفه = ويهناك نفس ما تغير طبوعها
وقلبٍ يحس بكل شيٍ نحس به = وجوارحٍ لله عجلٍ خشوعها
وعينٍ باذن من سلسل الماء من السماء = يوم القيامة تشهد الها دموعها
واخوك ابو خالد ولي عهدك الوفي = راعي الجهود اللي كبارٍ نفوعها
سلطان سلطان النواميس والسعد = امانها ومروع اللي يروعها
غيث الضعيَف والمعوق والارملة = اللي من الفرقا ولعها يلوعها
جتها الفجيعة في شريدة رجالها = ومن البكا بغت تحطم ضلوعها
هو سترها الضافي وهو ستر غيرها = لان المكارم تنثني له بطوعها
وأنتوا يا ابو متعب ذرانا من القصى = لازاع حزات الرخا ما يزوعها
وحنا على الميثاق والعهد والولا = قوة وطن تجلى الملامة وقوعها
آمالنا فيكم كبيرة ودارنا = نبغي معزتها ما نبغي خضوعها
العالم الثالث لا بد نتجاوزه = ونكبر الفرحه ونوقد شموعها
ندرس جديد التقنية ونتعلمه = ونعرف طرايقها ونعرف سنوعها
ونبني لنا صرحٍ يليق بمقامنا = له طلعةٍ يشوف الاعمى طلوعها
عدواننا عارٍ علينا سلاحنا = ان كان ما قمنا نفرق جموعها
حنا لدولتنا جنودٍ مجندة = حنا ذخايرها وحنا دروعها[/poem]