امدح اللي قبلك ببيت

[السيف النادر]

اولا / مساكم الله بالخير ( للي يقرا الموضوع من بعد الظهر )
أو صباح الخير ( للي يقرا الموضوع من بعد الساعة 12 الى 12 الظهر )


هذا فكرة جديدة ابتكرتها من راسي ( الا اذا كانت في موقع ثاني فوالله العظيم ما أدري عنها ) ، وهي انك تدخل وتمدح الشخص ( طبعا اذا كان يستاهل ) اللي شارك قبلك ببيت / او ابيات على ان لا تتعدى 3 ابيات سواءً من عندك أو لشاعرآخر .

انتم طبعا كلكم على عيني وراسي لكن ابختار شخص عشوائياً وبمدحه ببيت ،
......
.....
.....
.....
.....
....
.....
......
.....
الاختيار جاء على / خالد
وهو يستاهل واللله ( اكيد انتم موافقيني الراي )

والبيت هو :

هني من رافق من الناس شرواك= في ذمتي ليعــيش والراس مرفوع
تبقى عزيز ويعجبنــــي مزاياك= ياللي بيمناك اجزل الطيب مطبوع
عسى البلاوي والمصايب تعداك= تصيب ناس عـــنهم الطيب مقطوع


يالله والباقي عليكم ( خلونا نحرك الموقع شوي بدل السكون اللي هو فيه )

[ابن شويه]

يشرفني ان اكون اول من يرد على النادر

استلم

السيوف كثار ولاهي بسوى @@ و ياحظ من فــــــاز بالنادر

ســـــــرى الليل وذيبه عوى @@ وشربت انا فنجالي الخادر

[عاشق الوطن]

يابن شويه هضتني وانت مطفوق=قزيت عن عيني لذيذالمراحي
ان كان هو همك من الناس مخلوق=ماهمني لو كان زينه فضاحي
الهم موقعنا نبي شيلته فوق=مع الماقع ياصباح التماسي

[فارس الشواطي]

الله يعطيك العافيه يالنادر على هالفكره الطيبه


استلم يا عااااااااشق

ياعاشق الاوطان لك مني تحيّه .. في مجلس للقحاطين .. مدهالٍِِ
في مجلس عامر .. ضوّه حيّه .. عنوانه العود الازرق مع الفنجال
مع رجال على ماقيل مني وفيّه .. من صلب قحطـان شيخ عالي


الشواطي

[فارس قحطان]

ماشالله عليكم

اعذروني مأقدر اشارك معكم بالقصيد

ولكني مريت علشان اشكر لكم تفاعلكم مع بعض


والشكر لأخونا السيف النادر صاحب الموضوع


والموضوع يثبت



اخوكم
فارس قحطان

[شيخ المهادية]

استلم من فارس

مرحبا ترحيبه بها الاشواق. حيه*****بفارس شواطيء منتدى الابطال
فكره جابها السيف فكره ذكيه*****يا عسى تنجح الفكره يا رجال
واختم ابيات شعري وأدي تحيه*****على رجال تعطي قول وافعال

وسلامتكم...
بس اتمنى في المشاركات الجايه يردون بنفس الوزن والقافيه المكتوبه في المشاركه الي قبله يعني تكون نفس وزني قصيدتي وقافيتها وشكرا...
شيخ المهادية

[ابن شويه]

مالك هم يالذيب

استلم

ارحب ياشيخ شيوخ المهاديه @@ ترحيبة تاصلك ياطيب الفــــــال

الزيـــــر لو ينسى كليب خيه @@ مانسيت قروم(ن) صعبين المنال

لو تتنازل عن امنيتك ياالذيب يكون افضل لان بتنحصر وبتنعاد نفس الكلمات وراح توقف المشاركات

خل الدعوى مفتوووووحة

اخوك / ابن شويه

[السيف النادر]

صح لسانكم جميعا ، والله لا يهينكم على التفاعل ،
ابن شويه : انا معاك في رايك
فارس الشواطي : لا هنت وكفو والله
عاشق الوطن : البيت الاخير نبي فعل زيادة ولا انت والله انك ما قصرت
فارس قحطان : شكرا على التثبيت ونبي مشاركتك معناد
شيخ المهادية : صح لسانك وكفو ، لكن ما اوافقك الراي في انها تبقى على نفس القافية اللي قبل


واستلم يابن شويه

اهلا هلا بالذيب والفين ترحيـب = شرفتني يالذيب واضحكت سني
مذكور عند الناس بالهيل والطيب = حرُ ولد حرُ وما خاب ظني
تستاهل الامداح يالقرم لاريب =انت اجودي لك بالمواجيـب فنـي

[شيخ المهادية]

تسلم على الترحيب ابن شويه@@جعلك لنا ذخر في كل الاحوال
وعندي انا الامور كلها سويه@@والشورعندكم يا ذربين الافعال

ما عندي مشكله يا السيف النادر ويا ابن شويه بس لو ايكون الرد على يبدا باخر حرف انتهى منه البيت الي قبل ايكون احسن ...

[ابن شويه]

عز الله ان حظي زين


استلم يالشيخ

للمرجلة رجاجيل وللمشيخة شيخ @@@ وياسعد منهو غدا خوي(ن) له

اليا تصافقوا الصفين طاخ طيخ @@@ دونه دمـــي وارخص الغالي له

[شيخ المهادية]

هيهات ميلات في الشهم تلقاها@@ شجاع فزاع نفاع ربعه وناسه
مقدام ضرغام والشوامخ وطاها@@ رهيف وليف عفيف باحساسه


والسموحه ان كان به تقصير يا اخوان واستلم يلي بعدي...

[خالد آل مطرف العاطفي]

اخوي الغالي ...السيف النادر ..

والله العظيم . اني توني . شايف الموضوع .. بحكم ان متابعتي للمجلس سريعه ..
والحقيقه ..انك فاجأتني .باختيارك ... لأنك الله يعطيك العافيه ..جاملتني وانا ماستحق كل هذا الأطراء ..
الحقيقه الفكره ...جدآ ..ممتازه ..وبنحاول بعد رمضان تطويرها ...
المفاجأه الساره ..انه ماشاءالله معنا كوكبه من الشعراء ..الشباب اللي انشاءالله الموقع بيساعد على صقل مواهبهم
واتاحة الفرصه لهم ..ليثبتو وجودهم .. ..
السيف النادر .ابياتك ..والله ...قويه ..جدآ ..وتنم على انك شاعر .. وابشر انشاءالله ابحاول ارد على الأبيات ..
مع العلم انني لست ..بشاعر .. ولكن ..تقديرآ ..لك ..اخوي ..السيف ...بحاول ..وعسى الله يعيني ..

ابن شويه & الشواطي & شيخ المهاديه & عاشق الوطن
لاهنتو ...جميع .........الله ..يبارك ..فيكم ....
ومشاركات ..من جد ....فعاله
ومشكور يافارس قحطان ...على التثبيت ...

اخوكم اللي توهق باالقصيده وهو مع جنبها /خالد

[شيخ المهادية]

هي الحقيقه تعرف انك غير@@ولا قالوا بالكذب انك شخص ثاني
هي درت ما درت خير يا طير@@المهم انت يالشهم لك دور انساني
تزرع المحبه بالقلوب بالخير@@وتجني ثمار حبك في يوم الامحاني
هذا قولى النهائي والاخير@@انك انسان طيب ما يختلف فيك اثناني

[ابن شويه]

مسيت بالخير يالشيخ

استلم

لعن ابو جدك ياسالم الزير @@ قضى عمره وهو يطرد الجاني

لا حبت الخشم ولادهنت السير @@ ردته من لبسة ام تيجاني

و شيخ المهادية له اسلوب غير @@ يسيسها من اقصاها الى الداني

[السيف النادر]

اخوي / خالد


صح النووووم ، صباح الخير ، وش هالنوووم الي انت فيه . على كلٍ نوم العوافي

وأنا اقووول معقوووله خالد الي مافيه موضوع ما يشارك فيه ، يخلي موضوع فيه مدح له وهو يستاهل .
قلت اكيد يتثيقل بس ما عليه اهم شئ يشوف الموضوع وبس .

ما بالنسبة للإطراء فالليي يحدده مهوب انت وانا اخوك يحدده فعلك ، وان كان ما شفنا لك فعل ، فمنطوقك فالرجال يعرف بمنطوقه ويقولون كانوا اول اذا جاء ضيف لأحدهم قام ينشده ويستفسر عنه من وين جيت ووينك رايح فإن كان منطوقه منطوق رجال ذبح له من اطيب الحلال وزاد في ترحيبه وتكريمه وان كان منطوقه منطوق سلح ( الله يكرم لحاكم ) فيذبح له ذبيّحه تمشي الحال ، وانشغل عنه . وانت يدل منطوقك انك رجل ولا يحتاج ازيد على هالكلام .


اما بالنسبة للشعار فالمستوحذ على نصيب الأسد فهم الاخوان : شيخ المهادية ، وابن شويه مسوين لوبي ومسيطرين على الوضع من كل الجهات . الله يوفقهم ويجزاهم خير .

اما بالنسبة للأبيات فعز الله ماكلفتني الا قرايتها في الجوال وطقتين على الكيبورد ، ولا انا والله من جنبها ( انا بغيت امشيها لك واقول الابيات لي :050103nbhبس خفت احد الاعضاء يكشف المقلب ويوهقني فقلت يارجال تجي مني ولا من غيري )


والشكر موصــــــــــــــــــول للأخوان


اخوك اللي من من جنبها من جد : السيف النادر

[شيخ المهادية]

هلا والف هلابك يا وجه الخير@@الي بلقياك صرت اسعد انساني
بالفكر والشعر تحديت الزير@@ونقدر نسميك ياخوي زيرنا الثاني
ابن شويه لك حشمه وتقدير@@ويكفي انك تبدع والابداع ينصاني

[عبدالرحمن]

السلام عليكم ورحمة الله وبركاته

أخوي السيف النادر أسف كل الأسف انني لم أكن من الأوائل في ها الموضوع

وأستأذنك على هذه الأبيات في فارس قحطان لأنه لم يشارك فساهجوه بهذه الأبيات

[ استلم يافارس قحطان ]

سلام واللأبيات قلبي حملها = قلب يقدم لك عذيبات الألحان

هذي بيوت الشعر رأحت لهلها = وتسبق بيوت الشعر ارياح بستان

فارس على درب الجماله جملها = فارس عريب الجد والجد قحطان

وأختامها صلوعلى من عدلها = محمد المختار من صلب عدنان

أخوكم عبدالرحمن

[السيف النادر]

حياك الله يا عبد الرحمـــــن :

يامرحبا والله ومسهلا ، الموضوع زاد شرف بزيارتك ومشاركتك فيه .


الصراحة انا من المعجبين بمواضيعك المنوعة والى الامام في خدمة موقعنا ..

ومن ناحية هجائــــك لفارسنا ـ فياليت كل الهجاء مثل هجاءك كان ماصار فيه شئ اسمه مدح !!!!


اكرر شكري لك يااخوي عبدالرحمن


اخـــــ السيف النادر ـــــوك

[طير حوران]

كل الترحيب لبن شويه @@@@ وصاحب فكرة البيتين

يا ذيبٍ نسمع بعـــويه @@@@ ولا شفناه ابد بالعين

[ابن شويه]

ابشر بالسعد والهم جله @@ يازين هرجك ياطير حوران
تحيف مليح من غير زله @@ هو كذا ياناس ولا انا غلطان